ဘယ်သူမှမကြိုက်ပါဘူး
ဒဏ်ရာတွေနဲ့ စုတ်ပြတ်သတ်နေတဲ့ဘ၀
ပူလောင်ရွံရှာစွာနဲ့ဖက်တွယ်နေရတဲ့ ညည်းညူမှုတွေ
အခါးပေါ် အခါးလောင်းတယ်
ဒါကိုခါးတယ်ပြောမိတာငါ့အမှားပါ
ဖြေရှင်းချက်ကကြိုးရှရှတစ်ချောင်းလို
ငါ့တစ်ကိုယ်လုံးပွတ်တိုက်ဆွဲသွားတယ်
သွေးရှင်ရှင်တွေအပေါ်လောင်းချခဲ့တာ
မူးရစ်စေတဲ့အရည်တွေ
ဟိုးအဝေးကမကြားတစ်ကြားအော်တယ်
ဘာသိဘာသာမနေဘဲငါလိုက်ရှာတယ်
ဟုတ်တယ်
နင်ပါဘဲ
မက်မောစွာပြေးလိုက်မိတော့
တောခြောက်တယ်
ထွက်လမ်းဆိုတာ ဒီဘ၀မှာမရှိတော့ဘူး
မနက်ဖြန်တွေက သေခြင်းမလာသရွေ့သေချာနေတယ်
ဒူးထောက်နေတာကျောက်ရုပ်တစ်ရုပ်လိုဘဲ
အမှိုက်တစ်ထုပ်လိုအပစ်ခံရမှာသိနေရက်နဲ့
ပန်းချီကားတစ်ချပ်လိုနေရာရချင်နေမိ
ဒါပေမဲ့ ငါသိတယ်
ငါ့ကိုရိုက်ချိုးမယ့်လက်တွေက
နင့်လက်နှစ်ဖက်စာမကဘူး
မသာလာကြည့်သလို
မျက်ရည်တစ်စက်နဲ့ခေါင်းရမ်းပြတာ
တစ်ရက်တာအတွက်ဘဲလေ
ဘယ်မလဲ လူတွေပြောတဲ့ မေတ္တာ၊သစ္စာ
ငါမိနေတာ ကျိန်စာ
နှလုံးသားမပါဘဲပြေးထွက်သွားတဲ့နေ့တွေ
အသက်တောင်ဘယ်လိုရှုရမှန်းမသိလောက်အောင်
ပင်ပန်းတယ်
ငါတွက်တတ်တဲ့ပုစ္ဆာကို နင်အဖြေမထွက်တာ
အံ့သြပါရဲ့
အေးလေ..
မိသားစုဆိုတဲ့ ဂဏန်းပေါင်းစက်ကို
ငါ့လို ရဲရဲမနှိပ်ဝံ့တာ
တစ်ကိုယ်ကောင်းဆန်စိတ်တွေ များနေလို့ထင်ပါရဲ့ ။ ။
Subscribe to:
Post Comments (Atom)
No comments:
Post a Comment