ကိုယ်အမြတ်တနိုးထားတဲ့အရာတစ်ခုကို မက်မက်မောမော လိုချင်ရက်နဲ့ မရနိုင်မှန်းသေချာနေတဲ့အခါ ကံကြမ္မာကို ဒါမှမဟုတ် အပြစ်မတင်သင့်တဲ့အရာတွေလို့ သူသတ်မှတ်ထားတဲ့အရာတွေကို ကျွန်မ နာကြည်းစွာနဲ့ အပြစ်မြင်မိတာ ကျွန်မဘ၀ကို တစ်ဆစ်ချိုးပြောင်းလဲစေခဲ့တယ်။
ရဲလေး ရဲ့သီချင်းတစ်ပုဒ်လိုဘဲ “ မတော်တဲ့ ဖိနပ်ကို ဒုက္ခ ခံပြီးစီးလဲ ကျွတ်ထွက်တော့မှာ “ တဲ့။ အဲ့ဒိလိုပါဘဲ မလျှောက်သင့်တဲ့လမ်းကို နှစ်ယောက်သား မျက်စိမှိတ်လျှောက်လာပြီးမှ ခရီးမဆုံးခင် နောက်ပြန်လှည့်ချင်ပြီလေ။ တကယ်တော့လဲ အရှေ့ကလမ်းခရီးဆိုတာကလဲ အမှောင်အတိ။ လမ်းမရှိဘူး အလင်းရောင်မရှိဘူး။ ဒါပင်မဲ့ ကျွန်မတို့မိသားစုတွေရဲ့ မကြေမနပ်မှုတွေကို လှမ်းမြင်နေရတယ်။ ဟိုးအဝေးကြီးကတောင်မှလေ။
ဒီလိုလမ်းမျိုးကို သူဆက်မလျှောက်ပါဘူး။ ကိုယ့်ကိုကိုယ်ပြန်မေးကြည့်တယ် တကယ်လို့များ သူ့ရဲ့နွေးထွေးတဲ့လက်တစ်စုံသာ ကမ်းလှင့်နေခဲ့ရင် ကျွန်မကရော လျှောက်ဖို့ဝင့်ရဲပါ့မလား။ တကယ်တော့ ဒီမေးခွန်းကို သူ့ရဲ့ရင်ငွေ့နွေးနွေးမှာ စတင်မှီတွယ်မိစဉ်က ကျွန်မရဲ့အဖြေတွေဟာ သေချာနေခဲ့ပါတယ်။ ဒါပေမဲ့ အချိန်အတိုင်းအတာတစ်ခုနဲ့ အခြေအနေတွေအများကြီးက ကျွန်မရဲ့အဖြေတွေကို တိတိကျကျပြောရရင် အဲ့ဒိစကားလုံးတွေပြောမယ့်ကျွန်မ ပါးစပ်တွေကို စေးကပ်နေစေခဲ့တယ်။
ငယ်ငယ်ကဆို ပုံပြင်ထဲက မင်းသမီးလေးတွေကို ကျွန်မသိပ်အားကျမိတယ်။ ဆင်းရဲနိမ့်ကျတဲ့ဘ၀မှာ ရောက်နေရရင်တောင် ချစ်သူရဲ့ ကြင်နာယုယမှုတွေနဲ့ အချစ်တွေဟာသူတို့ဘ၀ကို သာယာစေတယ်။ ဒီအကြောင်းတွေသူ့ကိုပြောတော့ကျွန်မက အင်မတန်စိတ်ကူးယဉ်တယ်တဲ့လေ။ ဘယ်မိန်းမကများ ကိုယ့်ချစ်သူပေးမယ့်ကြင်နာယုယမှုတွေကိုစိတ်ကူးမယဉ်ဘဲ နေနိုင်ပါ့မလဲနော်။ ခက်တာက ဒဏ္ဏာရီဆန်ဆန် အချစ်တွေကို စိတ်ကူးယဉ်မိတဲ့ ကျွန်မဆီ လောကကြီးက ပို့ပေးလိုက်တာ ဘ၀ဆန်တဲ့ အချစ်ဇာတ်လမ်းတွေသာ ဖြစ်နေခဲ့တယ်။
“ သူငယ်ချင်းတွေလိုနေရအောင်လို့” သူစပြောတုံးက ကျွန်မလေ အဲ့ဒိ ရပ်နေတဲ့နေရာမှာ အသက်မဲ့လူတစ်ယောက်လို ဆွံအသွားခဲ့တယ်။ ကျွန်မရဲ့ ပတ်ဝန်းကျင်မှာလည်း ကမ္ဘာကြီးက ခြာခြာလည်လို့။ နှုတ်ခမ်းတွေဟာ ရက်ပေါင်းများစွာဖျားနာခဲ့တဲ့ လူတစ်ယောက်လို ခြောက်သွေ့သွားခဲ့တယ်။ အရက်စက်ဆုံး စကားလုံးတွေနဲ့ သူ့ကို ရန်တွေ့လိုက်ချင်ပေမယ့် ကျွန်မ နှုတ်ခမ်းက တောင်စဉ်ရေမရ စွာနဲ့ စကားလုံးတွေဟာ အဆီအလျှော်မတည့်စွာ ထွက်သွားကြတယ်။ သူကနူးညံ့စွာပြုံးပြီး “ မင်းသိပ်ပင်ပန်းနေပြီ နောက်နေ့မှ ဆက်ပြောကြတာ ပေါ့လေ” တဲ့။ နောက်နေ့တွေမှာလည်း ဒီစကားတွေကို စတင်တူးဖော်ဖို့ ကျွန်မ အင်အားတွေမရှိခဲ့ပါဘူးလေ။ သူကတော့ ဘာမှမဖြစ်ခဲ့သလို ပြောင်လိုက်နောက်လိုက်နဲ့။
ကျွန်မ အရင်းအနှီးဆုံး ပတ်သက်ချင်တဲ့ ကျွန်မ ချစ်သူဟာ တစ်ဖြေးဖြေးနဲ့ ဟိုးအဝေးကိုရောက်သွားခဲ့တယ်။ အနာဂတ်အတွက် လျှောက်လှမ်းရန်မရှိဆိုတာ သေချာသွားတော့ ကျွန်မလေ မိုက်မဲစွာနဲ့ ပစ္စုပ္ပန် ကို ဖက်တွယ်ထားမိတယ်။ အဲ့ဒိမှာ အတိတ်ကလို ရင်ခုံသံတွေ မလတ်ဆတ်ဘူး။ လမ်းမရှိတဲ့အနာဂတ်လို မှောင်မဲမနေဘူး။ အေးစက်ခြင်းတွေ ကြီးစိုးနေပေမဲ့ တစ်ခါတစ်ရံ သူ့အပြုံးတွေကို ကျွန်မ တွေ့ရတယ်။ ကျွန်မ အထီးကျန်နေတဲ့ ရက်အချို့မှာ စကားသံချိုချိုကို နားစဉ်ခွင့်ရှိသေးတယ်။
ကျွန်မ မိုက်မဲတာလား အမှန်တရားကို လက်ခံနိုင်စွမ်းရှိသွားတာလားတော့မသိဘူး။ အဲ့ဒိ အေးစက်စက် နေ့ရက်တွေကို ဖြတ်ကျော်နေဆဲ တစ်ရက်မှာ ကျွန်မတို့နှစ်ယောက်ရဲ့နောက်ဆုံးဆိုတဲ့ ရက်တစ်ခုကို ကျွန်မကိုယ်တိုင်ဘဲ ဖန်တီးပစ်ခဲ့တယ်။ နာကြင်စွာနဲ့ အပြစ်တွေကို သူ့အပေါ်ပုံချ မိခဲ့တယ်။ ဘေးလူတစ်ယောက် အမြင်နဲ့ဆိုရင်ကော ဒီမလှမပ အချစ်တစ်ခု ဖြစ်တည်စေခဲ့တဲ့ ဒါမှမဟုတ် ပျက်စီးစေခဲ့တဲ့ အတွက် ဘယ်သူ့မှာ အပြစ်ပိုရှိတယ်လို့ ထင်ကြမလဲ။
ကိုယ်က ကောင်းမယ်ထင်ပြီး လုပ်လိုက်တဲ့ ကိစ္စ တစ်ခုဟာ အလွဲအချော်တစ်ခုလိုမျိုး ကျွန်မကို စိတ်အနှောက်အယှက်ဖြစ်စေခဲ့တယ်။ တကယ်ဆို ကျွန်မ မပျော်ပါဘူး။ ဒါပေမယ့် ကိုယ်ဆုံးဖြတ်တဲ့ကိစ္စကို ကိုယ်တာဝန်ယူနိုင်ရမယ်လေ။ ပြီးတော့ ဒါက ကျွန်မတို့နှစ်ယောက်အတွက်အဖြစ်သင့်ဆုံးသောလမ်း။ တစ်စုံတစ်ခုကို နားလည်နိုင်သွားတော့ ကျွန်မသူ့ ကို ပြောခဲ့တယ်။ အမှားတွေအားလုံးဟာ ကျွန်မ အပြစ်တွေဘဲ ဆိုတာလေ။
ဒီလောက်တိုတောင်းတဲ့ဘ၀လေးမှာ ကိုယ့်နာကျင်မှုအတွက် ကိုယ့်ချစ်သူကို အပြစ်ရှိသူလို့ ကျွန်မ မစွပ်စွဲရက်ပါဘူး။ မပေါင်းစပ်နိုင်တဲ့ဘ၀နှစ်ခု ကွဲကွာရတဲ့ တရားခံဟာ သူမဟုတ်သလို ကျွန်မလဲမဟုတ်ပါဘူး။ တကယ်တော့ ကျွန်မတို့ဟာ “ အချစ်” လို့အမည်ခံထားတဲ့ စွမ်းအင် တစ်မျိုးရဲ့ ဆော့ကစားမှုအတွက် နှလုံးသားတွေ စတေးခဲ့ရတာပါ။ ဒါပင်မဲ့ ကျွန်မအဲ့ဒိ အရာ နဲ့ ပြိုင်ပြီး ဘယ်တော့မှ ဒဏ်ရာတွေအကြောင်းမပြောတော့ဘူး။ အပြစ်တွေကိုလည်း အဲ့ဒိ “အချစ်” အပေါ်မပုံချပါဘူး။ ဘာဖြစ်လို့လဲဆိုတော့ သူက ကျွန်မတို့ဘယ်သောအခါမှ ယှဉ်ပြိုင်နိုင်မဲ့ အရာမဟုတ်လို့လေ။
Subscribe to:
Post Comments (Atom)
No comments:
Post a Comment